Nga Redaksia:
Tensionet ndërkombëtare janë rritur ndjeshëm pasi Moska ka reaguar zyrtarisht ndaj një sulmi izraelit pranë zonës ku ndodhen specialistë rusë në Iran. Autoritetet ruse kanë paraqitur një protestë diplomatike ndaj Izraelit pas një goditjeje ajrore pranë qytetit iranian Bushehr, ku punojnë shkencëtarë dhe specialistë rusë të sektorit bërthamor.
Sipas burimeve të informuara mbi zhvillimet, sulmi ndodhi pranë një zone rezidenciale ku jetojnë punonjës të centralit bërthamor të Bushehrit. Edhe pse nuk pati viktima apo të plagosur rusë, Moska e konsideroi incidentin jashtëzakonisht të rrezikshëm dhe kërkoi shpjegime nga autoritetet izraelite.
Sulmi ishte pjesë e operacionit ushtarak të Izraelit të njohur si Operation Roaring Lion, i ndërmarrë kundër regjimit islamik të Iranit dhe infrastrukturës së tij strategjike. Objektivi i sulmit ishte një central bërthamor pranë Bushehrit, por sipas palës ruse, goditja ndodhi në afërsi të zonave ku jetojnë punonjës të centralit.
Zyrtarët rusë u kanë bërë të qartë homologëve izraelitë se sulme të përsëritura pranë ekspertëve rusë janë të papranueshme dhe se Izraeli duhet të marrë masa paraprake për të garantuar sigurinë e tyre.
Drejtori i përgjithshëm i korporatës shtetërore bërthamore ruse Rosatom, Alexey Likhachev, deklaroi se rreth 639 specialistë rusë ndodhen aktualisht në Iran duke punuar në projekte bërthamore. Ai paralajmëroi se sulmet pranë objekteve bërthamore iraniane përbëjnë rrezik serioz dhe se shpërthimet janë dëgjuar vetëm disa kilometra larg centralit të Bushehrit, edhe pse vetë objekti nuk ka qenë objektiv i drejtpërdrejtë.
Kjo situatë rikthen në vëmendje edhe deklaratat e mëparshme të presidentit rus Vladimir Putin, i cili në vitin 2025, gjatë operacionit të Izraelit Operation Rising Lion, kishte bërë të ditur se Izraeli kishte dhënë garanci për sigurinë e personelit rus që punon në centralin bërthamor të Bushehrit.
“Ne ramë dakord me udhëheqjen e Izraelit që siguria e tyre do të garantohej”, kishte deklaruar Putin në atë kohë.
Ngjarja e fundit rrezikon të përkeqësojë më tej marrëdhëniet e ndjeshme mes Moskës dhe Tel Avivit, në një moment kur Lindja e Mesme ndodhet në një spirale të re përplasjesh ushtarake dhe diplomatike.